CEBU, Philippines - Gitulis sa tulo ka armadong mga lalaki ang usa ka lotto outlet uban sa tag-iya ug mga kawani niini sa NGO Compound, Dalan P.C.Sanchez, Barangay Pagsabungan, Dakbayan sa Mandaue alas-7 pasado ang takna sa miaging Biyernes sa gabii.
Si PO2 Richard Ares sa kapolisan sa Presinto 3 sa Mandaue City Police Office (MCPO) miila sa mga biktima nga naglakip sa teller nga si Niña Mea Aurestela, kinsa gikuhaan sa P2,000 nga halin sa sulod sa kaha ug cellphone niini.
Matud pa ni Ares nga lakip sa gitulis ang tag-iya sa maong lotto outlet nga si Bernamea Maglasang, 39, apan nakuhaan lamang kini sa iyang mahalon nga cellphone.
Dugang sa gikuhaan nga kawani ni Maglasang mao sila si Florentino Encong, 18, Elyfreda Macua, 27, house helper ug Gerald Puentello nga maoy ilang water billing sa patubig niining negosyo.
Namingaw na ang mga namusta og numero sa maong lotto outlet ug naabli ang gate sa compound sa maong panimalay maoy hinungdan nga nakasulod sa compound ang motorsiklo nga giluwanan sa tulo ka tawo ug gipangtionan ang mga biktima sa armas ug mideklarar og tulis.
Si Ares miingon nga gipangayo pa unta sa mga suspetsado ang tibuok adlaw nga kinitaan sa maong lotto outlet apan gipasabot sa teller nga nahurot ang kuwarta sa nakadaug sa suwertres nga bag-o lang mikubra. (BANAT NEWS)