CEBU, Philippines - Lain na ‘sab nga mga barangay ang gironda sa kapolisan ug miresulta sa pagkasakmit sa shabu nga gibanabanang mokabat og P2 milyones kagahapon sa kaadlawon.
Ang mga sakop sa Regional Intelligence Branch (RIB), Regional Special Operations Group (RSOG 7), Regional Anti-Illegal Drugs Special Operations Task Group (RAIDSOTG 7) mironda sa Barangay Pasil ug Ermita ning dakbayan sa Sugbo. Girombo sa kapulisan nga armado og search warrant nga giisyu ni Judge Wifredo Navarro ug Judge Soliver Peras ang mga balay sa lima ka gipasanginlang notadong drug pushers sa maong mga barangay.
Matud pa ni Senior Superintendent Conrad Capa, ang deputy chief sa Police Regional Office (PRO7) nga moabot sa duha hangtod tulo ka semana nilang gi-monitor ang kalihokan sa maong mga suspek.
Apan duha sa subject sa warrants ang nakaipsot nga giila nga sila si Marjorie Tagalog ug usa ka Rizza Cabugason nga taga Pasil.
Apan nadakpan ang laing tulo nga sila si Robert Genovisa kinsa nakuhaan og .38 Smith & Wesson revolver ug upat ka pakete sa drugas, Breezy Abesia Borbon nga nakuhaan og usa ka dakong pakete ug tulo ka medium size paketeng shabu ug si Annabelle Zamora.
Samtang apil sa gidakop mao sila si Ronnie Ramas, Lanjel Puza Derelon ug Edwin Villagracia Tagalog. Narekober sab sa kapulisan ang cash money nga 46 mil gikan sa balay ni Cabugason.
Duna sa’y nakuha nga blue book nga nasakmit ang mga operatiba nga diin dunay nakabutang nga pulong “polis” nga dunay gilista sa kilid nga kantidad sa salapi nga posibleng nadawat niini sa ilegal nga kalihokan. Ang hepe sa San Nicolas Police Station kung asa ubos sa pagdumala ang area sa Pasil , Senior Inspector Chuck Barandog mipasabot nga lisod kaayo pag-ila kung iya ba nga sakop ang gipasabot nga “polis” sa maong blue book.
Apan nagplano siyang mohimo og linain nga imbestigasyon kabahin niini ug kun mamatud-ang iyaha kining sakop gipasalig niyang siya maoy mangunay pagpaslak niini sa prisohan. Ang maong operasyon ang kabahin kini sa regionwide crackdown batok ilegal nga drugas nga gimando sa hepe sa Police Regional Office (PRO 7).
Sa miaging adlaw, P2.5 milyones nga drugas ug 13 ka mga armas ang nakuha ug 17 ka tawo ang nadakpan sa kapulisan gikan gihapon sa dungan nga operasyon sa lima ka barangay gikan sa duha ka siyudad sa Cebu City ug dakbayan sa Mandaue. (BANAT NEWS)