CEBU, Philippines - Usa ka 15-anyos nga estudyante naghikog tungod sa kauwaw dihang gikasab-an sa iyang maguwang atubangan sa iyang mga classmates diha sa ilang eskuylahan sa Sitio Alolong, Barangay Paril, Barili sa miaging Lunes.
Si PO3 Dennis Jacalan sa Barili police station nagkanayon nga migamit og extension cord ang tinun-an nga gihikot niini sa iyang liog ngadto sa taas nga bahin sa atop sa ilang balay.
Si Dr. Michelle Anne Recto ang Rural Health Unit officer sa Barili mideklarar kaniya nga patay na.
Ang inahan sa bata nagtrabaho sa Cebu City ug panagsa lang kini mag-ulian samtang buwag kini sa iyang bana nga atoa na sa Manila.
Si Jacalan miingon nga broken family ang pamilya sa bata ug gibilin ra sila diha sa iyaan.
Matud pa sa iyaan mireklamo ang bata kay gikasab-an siya sa maguwang nga babaye nga diha sa ilang tunghaan atubangan sa mga classmates.
“Nisumbong ning bata sa iyang iyaan nga nauwawan kuno siya sa iyang mga classmate tungod sa gibuhat sa iyang maguwang,” matud ni PO3 Jacalan kinsa midugang nga giingong dunay kakulian sa pangisip ang maguwang. (USJR Intern/EIM) (BANAT NEWS)