CEBU, Philippines - Nawad-an sa iyang salapi nga kinitaan ang usa ka taxi drayber nga biktima sa pagpanulis sa nagbinugtong niya nga pasahero alas dos pasado kaniadto’ng Martes sa kaadlawon sa reclamation area sa Barangay Subangdaku, dakbayan sa Mandaue.
Ang biktima mao si Benjamin Marabilis, 63, minyo nga taga Nevil Hills, dakbayan sa Sugbo ug drayber sa M and J taxi (7-CA 1143 ug body number 3060.)
Si PO1 Fredelou Quezon sa Presinto 2 sa Mandaue City Police Office (MCPO) miingon nga gisaysay sa biktima nga ang tulisan misakay kini sa Urban Homes sa Barangay Tipolo ug miawhag nga magpahatod sa reclamation area.
Dihang nahidangat na sila sa maong lugar ang pasahero nga naglingkod sa luyong lingkoranan kalit lang mition og armas sa tangkugo sa drayber ug mideklarar nga tulis.
Matud pa ni PO1 Quezon nga gikuha sa tulisan ang iyang kinitaan nga nagkantidad og P3 mil ug pagkahuman nanaug kini sa maong dapit ug yano lamang kining naglakaw pahilayo. (BANAT NEWS)