CEBU, Philippines - Nasikop sa Provincial Intelligence Branch (PIB) ang alalay sa usa ka level 2 drug pusher sa isla sa Camotes human kini nabiyaan sa dihang abtik nga nakasibat ang target sa kapolisan.
Usa ka Edmund Pormentera ang target unta sa kapolisan apan ang alalay nga si Dindo Caballes maoy nasikop human sa tulo ka semana nga pag- monitor sa operatiba sa PIB.
Matud ni SPO1 Francis Villamor sa PIB nga nakabantay si Pormentera sa nagpadulong nga pulis sa iyang panimaye hinungdan nga daling nakalayat ug gibiyaan ang kauban.
Nasakmit sa kapolisan ang usa ka dakung pakete sa shabu, 20 ka medium size nga putos ug 30 ka gagmay’ng pakete nga gibana-banang mobalor sa P50 mil.
Si Caballes nga nadakpan sa kapolisan ang nakuhaan og lima ka paketeng shabu.
Sa nakuhang impormasyon, gikan sa dakbayan sa Sugbo ang mga drugas nga ilang gibaligya sa Camotes ug gihatud lang sa ilang kontak. (BANAT NEWS)