CEBU, Philippines - Patay ang usa ka lalaki human gidunggab sa iyang ig-agaw niadtong Sabado sa hapon sa lungsod sa Dalaguete.
Giila ang biktima nga si Regin Amamangpang, 30, minyo, taga Maloray, Dalaguete.
Samtang nasikop sa kapolisan ang suspetsado nga giila nga si Presly Amamangpang, hingkod, silingan ra sa biktima.
Matud ni PO2 Reynaldo Vidas sa Dalaguete Police Station nga nahinabi sa Banat News nga duna na’y dugay nga panagbikil ang duha ug nausban lang niadtong higayona.
Sumala pa nga samtang naglakaw ang biktima agi sa panimalay sa suspetsado, gisangpit kini sa suspek ug gikomprontasi sa ilang naunang bikil.
Human sa panaglalis, nahitabo ang sinukmagay apan nakahigayon og kuha sa kutsilyo ang suspetsado ug gidunggab sa likod sa biktima dayun sibat apan nasikop ra sa kapolisan sa follow-up operation.
Dali pa untang gidala sa Cardinal Rosales Memorial Hospital sa Dalaguete ang biktima apan patay na kini nga naabot sa maong tambalanan. (BANAT NEWS)