CEBU, Philippines - Ang kahugpongan sa mga drayber ug passenger jeepney sa Mandaue mipasalig nga mutabang sila nga madakpan ang mga kolurum nga sakyanan.
Si Romeo Armamento nga maoy presidente sa Mandaue United Driver’s Association-National Confederation Transport-worker Alliance (MUDA-NCTA) mihimo sa iyang pasalig ngadto sa kadagkoan sa Land Transportation Office (LTO)-7.
Nanganti si Armamento nga samtang dili pa mapahunong ang pagpatuman sa Joint Administrative Order 2014-01 tabangan ang LTO aron madakpan ang mga kolurum nga sakyanan nga mamasahero sa kadalanan.
Matud ni Armamento nga magtigom ang iyang grupo aron hisgotan kun unsay ilang matabang sa kagamhanan aron mapalambo ang kampanya batok sa mga kolurum nga sakyanan.
“Mutabang kami sa gobiyerno sa pagbantay nga kanang mga kolurum dili na makadagan sa pagpamasahero sa kadalanan kay tungod sa mga kolurum mokunhod man ‘sab ang kitaon sa mga legitimate driver ug operator,” matud ni Armamento.
Kun tinuoray nga ang mga drayber muabag aron masakpan ang mga kolurum sigurado nga mapuo ang wala’y prangkisa nga sakyanan kay sila maoy labing nasayod kun ang serial numbers sa makina ug chassis sa gimaneho nila nga sakyanan wala na motukma sa nalista sa certificate of registration.
Nasayran nga daghan sa mga tag-iya og public utility vehicles nga kun maguba na ang ilang makina, direkta ra sila nga mopalit gikan sa lainlaing baligyaanan ug ipuli nga dili na mananghid pa sa LTO. (BANAT NEWS)