CEBU, Philippines - Nalandig sa tambalanan ang 35-anyos nga babaye human kini giunay pagdunggab sa iyang manghod didto sa Sitio Lawis, Barangay Luray II, dakbayan sa Toledo.
Si Josephine S. De Lima giingon nga mikasaba sa iyang pag-umangkon nga anak sa suspek nga si Janrey Segovia mao nasuko kini ug siya gidunggab.
Base sa imbestigasyon nila ni PO2 Jeffrey Caburnay ug PO1 Jonathan Cuizon nga nakit-an g’yud ni Segovia nga gikasab-an ang iyang anak sa iyang maguwang babaye.
Si Segovia mikuha og hait nga hinagiban ug gidunggab ang iyang maguwang makatulo ka higayon. Ang biktima nakaangkon og mga samad dinunggaban sa wala nga bahin sa dunggan, kamot ug sa buko-buko.
Dali nga gidala ang biktima sa Toledo City Hospital apan kay gihulagway nga grabe ang iyang kahimtang gibalhin kini sa tambalanan sa dakbayan sa Sugbo. Ang kapolisan nagmalampuson pagsikop sa suspek ug gitanggong karon sa bilanggoan samtang giandaman og kaso nga ipasaka kaniya posible ugma’ng adlawa. (BANAT NEWS)