CEBU, Philippines - Sikop sa gihimo nga random checkpoint sa Regional Public Safety Battalion (RPSB) 7 ang duha ka mga lalaki nga nakuhaan og shabu ug revolver, pasado alas 2:30 sa hapon, sa nakalabay nga adlaw diha sa Barangay Bolinawan, Carcar City.
Nasikop nila ni Police Inspector Alvino Enguito sa RPSB 7, sila si Ronald Lapinig, 29, taga Poblacion 3, Awayan, Carcar City, nga nakuhaan og .357 revolver nga dunay tulo ka mga bala samtang upat ka paketeng shabu ang nasakmit gikan sa angkas niini nga si Ronnel Lauron, 21. Matud pa nga nabantayan nilang walay plate number ang motor sa duha hinungdan nga ilaha kining gisita ug sa pagsusi kanila nakit-an ang armas ug drugas.
Ipaubos sa ballistic examination ang nakuha nga armas aron tan-awon kung nagamit ba kini sa ubang krimen. (BANAT NEWS)