CEBU, Philippines - Tungod sa pagkasikop sa usa ka hired-killer, backup niyang miikyas ug mastermind pagpatay sa usa ka fish vendor sa Sitio Fatima, Barangay Basak, Dakbayan sa Mandaue sa miaging adlaw nangadakpan.
Ang unang nadakpan mao si Regor Obanan Salazar, 28, taga Buhisan, dakbayan sa Sugbo ug ang lookout ug driver niini nga si Jhonry Caballero Sabejon alyas John-John, 32, taga Buhisan, dakbayan sa Sugbo.
Ang duha maoy gitumbok nga mipusil patay kang Marlon Enate Bantolinao, 30 anyos nga taga Tabok, Lamac, Yati, Liloan.
Si Salazar unang nadakpan nila ni Senior Inspector Genilo Veraque, hepe sa kapolisan sa Presinto 3 sa Mandaue City Police Office (MCPO) atol sa pagsibat niini sakay sa PUJ human gibiyaan ni Sabejon kinsa naratol.
Nadakpan si Sabejon sa joint follow up operation nila ni Senior Inspector Veraque ug sa mga sakop sa Investigation Detection and Management Bureau (IDMB) sa MCPO nga gipangulohan sa ilang hepe Senior Inspector Jimmy Portes.
Nakuha gikan ni Sabejon ang usa ka Honda Wave nga motorsiklo nga nagdala sa plate number nga 4304-IS nga giingong gimaneho niini dihang gipusil patay ni Salazar si Bantolinao.
Nadakpan usab sa team nila ni Veraque ug Portes si Giovanni Navaja Albano alyas Dewen, 30, nga taga Kan-asuhan, Dakbayan sa Carcar ug kasamtangang nagpuyo sa Sitio Santo Rosario Barangay Labangon, dakbayan sa Sugbo nga giila ni Sabejon ug Salazar nga maoy nagsugo kanila.
Si Sabejon nga nahinabi sa Banat News miingon nga ang namatay nga si Bantolinao nasaypan lang ni Salazar sa pagpusil patay tungod kay susama man ang pamustora sa tawo nga gisugo kanila nga maoy ilang patyon niadtong higayona.
Dugang pakisusi karon ang ilang gihimo ni Senior Inspector Portes tungod dako ang ilang pagtuo nga ang mga dinakpan nalambigit usab sa pagpusil patay sa magpapatigayong babaye nga nahitabo sa flyover sa Maguikay niadtong miaging bulan. (BANAT NEWS)