CEBU, Philippines - Naglaom ang mga batan-on nga mahiligon sa skate board nga kabutangan sila og lugar nga adto itugot sa kagamhanan sa dakbayan sa Mandaue ang pagpasundayag sa ilang abilidad ug pagbansay sa ilang nauyonan nga sports.
Ang mao nila nga pangandoy gibutyag agi og reaksyon sa gipalabang nga ordinansa ni Konsehal Elstone Dabon nga nagdili na sa pagpasiugda og skating activities sa kadalanan aron paglikay sa mahitabo nga aksidente.
Gisugyot ni Konsehal Dabon ang maong ordinansa nga gibase usab sa mga aksidente nga nahitabo sa kadalanan sa dakbayan diin ang mga batan-on nga mag-skate board motipon pa sa ilang pagpadagan sa daghang mga sakyanan.
Ang maong ordinansahon ni Konsehal Dabon nga magdili na sa hingpit sa pagsakay og skateboards sa Mandaue pagatukion kini sa regular session karong adlawa alang na sa third ug final reading.
“As a step to lessen these kinds of misfortunes, it is better to regulate the use of roller skates, roller blades and roller boards on all public roads within the city’s jurisdiction, where big trucks and all types of motorized vehicles pass,†matud ni Dabon sa iyang gisugyot nga ordinansa.
Kun maaprobahan ang maong ordinansahon ni Konsehal Dabon, gipaabot nga ang Traffic Enforcement Agency of Mandaue (TEAM) mo-ila og lugar sa dakbayan nga pagatawgon og roller skaters o skate boarders area.
Ang ordinansahon ni Dabon naglatid og multa alang sa makahimo og kalapasan nga naglakip sa P500 apan dili molabaw sa P1,000 o pagkabilanggo og 10 ngadto sa 15 ka adlaw subay usab sa luwatan nga hukom sa korte.
Ang roller skates, roller blades o skate board sa madakpan nga nakahimo og kalapasan sa maong ordinansa sakmiton . (BANAT NEWS)