CEBU, Philippines - Gikwestiyon sa Commission on Audit ang paghatag og honorarium ngadto sa 22 ka barangay chapter presidents sa Federation of Senior Citizens Association ug Election Registrar sa dakbayan sa Talisay.
Matud sa COA nga ilegal ang paggasto sa kagamhanan sa pondo nga nikabat kapin sa tunga sa milyon ka pesos.
Si Cymberline Celia Chiong-Uy, supervising auditor officer-in-charge nga nadestino sa dakbayan sa Talisay, nagkanayon nga ang hepe lang sa Office of the Senior Citizen Affairs (OSCA) ang gitugotang makadawat og honorarium nga ubos sa salary grade 10 gikan sa kagamhanan.
Base sa COA report, ang presidente nakadawat og P4,000 nga honorarium matag buwan, ang vice-president P3,500, ang secretary ug treasurer tag P3,300 matag usa kanila, ang auditor ug ang duha ka PRO tag P2,500, ug tag P2,000 ang upat ka miyembro sa Board of Trustees ug ang 11 ka chapter presidents.
Matud ni Chiong-Uy nga mikabat ngadto sa P530,400 ang nahatag sa siyudad ngadto sa hepe sa OSCA lakip na ngadto sa mga chapter presidents ug officers sa tuig 2013.
Ang COA mipasidaan usab nga dili mohatag og bayad ngadto sa mga election officer nga gidestino sa lugar sanglit dili sila lakip sa mga nasudnong opisyal sa gobyerno nga gitugutang makadawat og honorarium gikan sa lokal nga kagamhanan diin sila madestino.
Nasuta sa COA nga ang siyudad mihatag og P4,000 matag buwan nga mikabat ngadto sa P48,000 sa usa ka tuig nga honorarium sa election officer. (BANAT NEWS)