CEBU, Philippines - Kritikal ang usa ka lalaki human pusila sa makadaghan sa usa ka barangay konsehal sa Cagay, Sibonga kagahapon sa buntag.
Ang biktima giila nga si Michael Caballero, 26-anyos, mag-uuma nga nagpuyo sa maong lugar ang daling gidala sa Vicente Sotto Memorial Medical Center tungod sa naangkon nga daghang samad sa lain-laing bahin sa lawas.
Ang suspek nailhan nga si Joselito Labella, 37-anyos, konsehal sa barangay Papan, Sibonga.
Matud ni SPO1 Antonio Sanchez sa Sibonga Police Station nga nigawas sa inisyal nga imbestigasyon nga ang pagpusil ni Labella kang Caballero agi og balos sa pagpusil kang William Fernandez nga ig-agaw sa konsehal.
Ang pagpusil kang Fernandez nahitabo pipila ka oras sa wala pa ang pagpusil kang Caballero.
Ang suspek kasamtangang gitanggong sa Sibonga Police Station samtang padayong naghimo og imbestigasyon ang kapolisan sa tinood nga rason sa pagpamusil. (BANAT NEWS)