CEBU, Philippines - Gilugos sa wala pa mailhing lalaki ang usa ka 7-anyos nga babaye sa barangay Poog, dakbayan sa Toledo.
Gibalhin sa Vicente Sotto Memorial Medical Center (VSMMC) sa dakbayan sa Sugbo ang biktima gikan sa Toledo City Hospital tungod sa pagdugo sa kinatawo sa biktima.
Matud ni Felix Alferez, hepe sa tanod sa barangay Poog, nga nangayo og tabang ang inahan sa biktima dihang nakita nga nagdugo ang kinatawo sa bata ug adunay bun-og sa ubang parte sa kalawasan.
Giingong nahinanok sa pagkatulog ang inahan sa biktima ug ubang sakop sa pamilya sa dihang nisulod ang lalaki nga miaswat sa 7-anyos paingon sa gawas.
Didto sa kalibonan giingong giamong-amongan ang biktima ug gibiyaan human sa insidente.
Nipauli ang bata nga aduna’y bun-og sa nawong timailhan sa gibangot nga panapton tabon sa baba aron dili makasiyagit.
Mitug-an ang biktima sa gihimo sa lalaki kinsa iyang mailhan kung iya kining makit-an.
Padayon pang mihimo og dugang imbestigasyon ang Women and Children’s Desk sa Toledo City Police Station kalabot sa maong panghitabo. (BANAT NEWS)