CEBU, Philippines - Ang kapolisan sa Davao mibutyag nga duna silay nadawat nga impormasyong P20 milyones ang gibayad aron patyon ang negosyanteng si Richard King.
Sumala pa ni Davao City Police Office director Senior Superintendent Vicente Danao Jr. usa ka babayeng negosyante ang posibleng mibayad sa hitman.
Gituohan usab nilang gi-kontak sa maong negosyante si Superintendent Leopoldo Felonia aron pagpangita og killer.
Si Chief Superintendent Wendy Rosario, director sa Police Regional Office-11 sa interbyu kaniya didto sa Camp Crame, nagkanayon ang tulo ka dinakpan igo lang gisugo ug wala sila masayod kun diin gikan ang P30,000 nga gibayad kanila.
Nagpabiling anggulo sa negosyo, personal ug uban pang motibo ang gisubay sa kapolisan.
Apan sa pagkakaron, miangkon si Rosario nga wala pa silay konkretong ebidensya batok kang Felonia gawas lang sa pamahayag sa tulo ka suspek.
Sa laing bahin, mga kabanay sa tulo ka mga suspek nga mipatay sa negosyanteng si Richard King ang nakadawat og hulga sa ilang kinabuhi.
Kini ang gipadayag sa mother in–law ni Dave Labang ang miangkong mipusil patay ni King. Lakip ‘sab sa mireklamo sa kapulisan nga nakadawat og hulga sa ilang kinabuhi ang mga asawa ug mga paryente sa lain pang kauban ni Labang nga sila si Rodel ug Romel Dela Cerna.
Sumala pa sa nakuha nga impormasyon gikan sa GMA 5 Davao, midangop sa kapulisan ang mga paryente sa mga suspek gumikan duna’y mga magsakay og motorsiklo ang magsige og parking duol sa ilang mga balay nga magpangutana kun duna na ba sila’y mga abogado ug gipangita pa ang igsoon ni Labang.
Sa report sa GMA 5 Davao usa sa mga kabanay ni Labang ang mitug-an nga apektado na hasta ang pagtungha sa ilang mga anak.
Gipasalig hinuon sa hepe sa Davao City Police Office nga si Senior Superintendent Vicente Danao Jr., nga andam sila nga mohatag og seguridad sa mga pamilya sa mga suspetsado.
Mibahad sab kini sa mga nanghulga sa mga kabanay sa mga suspek, ilabina sa pamilya ni Labang nga andam ang kapulisan nga mopatay kanila kung sila mag-abot.
Samtang sa laing bahin, pormal na sab nga gipasakaan og kasong murder ang upat ka suspek apil si Senior Superintendent Leonardo Felonia nga maoy gitumbok nga mastermind sa maong krimen. (BANAT NEWS)