CEBU, Philippines - Usa ka 26-anyos nga lalake ang gidakop sa kapolisan human sa negosasyon dihang iyang gidagit ang 8-anyos nga pag-umangkon sa Sitio Kalangyawon Barangay Napo, Carcar City sa miaging adlaw nga Domingo.
Ang suspek kansang pangalan gipugngan sa Banat News aron taguon ang pagkatawo sa bata, armado og .357 rebolber ug giingong midagit sa pag-umangkon ug gidala sa iyang payag diha sa kalibonan.
Matud ni SPO3 Jorame Tanudtanud base sa impormasyong ilang nadawat dunay kakulian sa pangisip ang suspetsado.
“Iyang pasangil kay naa kuno’y mopatay niya, pero sa among imbestigasyon wala man ni siya’y kaaway,†matud pa ni Tanudtanud.
Ang kapulisan sa Carcar ug mga opisyales sa barangay uban sa pamilya sa suspetsado maoy nakig-negotiate sa suspek hangtud nga paglabay sa pipila ka oras gibuhian nila ang bata ug mitahan.
Nakuha sa kapolisan ang usa ka kalibre .357 rebolber nga way lisensya nga matud pa sa suspek iyang proteksyon sa tawong mopatay kaniya.
Ang suspek kasohan og kalapasan sa R.A 8294 kon Illegal Possession of Firearm. Samtang gipaabot pa kun mosang-at og kaso ang ginikanan sa bata batok sa suspek. (BANAT NEWS)