CEBU, Philippines - Patay ang usa ka menor de edad human malatayi ug napiit sa giayo nga awto sulod sa matud pa gitrabahoan niya nga shop sa barangay Dumlog sa dakbayan sa Toledo niadtong nakalabay’ng gabii.
Giila ang namatay nga si Rolly Sigar, 16 anyos, residente sa nahisgutang lugar.
Matud sa kapulisan sa Toledo City Police Station nga wala sila makadawat og impormasyon kalabot sa maong aksidente ug nadungog na lang nila kini sa usa ka sibyaanan.
Dugang sa kapulisan nga posibleng gihilom sa tag-iya sa shop ang nahitabong aksidente sa iyang sakop.
Ug tungod sa maong report, daling nipahigayon og imbestigasyon ang kapolisan kalabot sa hitabo.
Nasayran nga nag-ilis ang biktima sa ligid sa giayo niini nga awto apan giingong mipalyar ang jack nga maoy nagsuporta sa lawas sa sakyanan hinungdan nga nidagan ang sakyanan ug nalatayan ug napiit ang biktima.
Matud pa sa kapolisan nakapangayo pa og tabang ang biktima sa kaubanan niini apan dihang gidala kini sa Toledo City District Hospital gideklarar kini nga dead on arrival. Gisusi pa sa kapolisan kung kinsa manubag sa maong hitabo, apan subay sa balaod gidili ang pagpatrabaho sa mga bata. - /EIM (BANAT NEWS)