CEBU, Philippines - Nasubay na sa Provincial Intelligence Branch (PIB) kung kinsa gayud ang mitabang sa 17-anyos nga batan-on dinakpan sa Medillen Police Station nga nakaeskapo ug nakaabot pa sa siyudad sa Bacolod City.
Si Chief Insp. Rodulfo Albotra ang hepe sa PIB miingon nga ang mismong 18-anyos nga si Jessie Allamado miluwat og affidavit ug iyang giangkon nga ang iyang mga ginikanan maoy nitabang kaniya nga makaeskapo, sukwahi sa unang migawas nga gihimakak nila ang kalambigitan nila sa maong panghitabo.
Sumala pa ni Albotra nga tuyo lang unta sa batan-on ang pag-adto sa ilang panimalay, apan gitabangan kini sa iyang ginikanan aron makasibat apan didto sa Bacolod City nahutdan siya og kwarta maong mitahan siya sa mga polis didto.
Usa sab sa gisubay karon sa PIB ang gitug-an sa dinakpan nga duna kini nahibaw-an nga mga kahiwian sa pagdumala sa hepe sa kapulisan sa maong lungsod, ilabina sa problema sa drugas.
Apan si Chief Fructuoso Lim, hepe sa Medillen Police nga nahinabi sa mga tigbalita nagduda sa pamahayag sa maong batan-on kay posibleng gigamit lang kini sa mga sindikato sa drugas nga iyang nabanggaan sa iyang kampanya sa maong lungsod.
Nagtuo usab siyang dunay kasuko kaniya ang ginikanan sa batan-on ug gusto siya nga dauton sa iyang katungdanan.
“Duda ko nga gigamit lang na siya sa mga naigo sa among kampanya sa drugas,†matud pa ni Lim kinsa misaad nga iyang atubangon kung ipaubos siya sa imbestigasyon.
Si Albotra miingon nga mag-atubang gayod og imbestigasyon sa kasong administratiba si Lim tungod sa pag-eskapo sa maong batan-on kinsa gitanggong na karon sa karsel human nag 18-anyos na ning bag-ohay lang.
Ilaha na usab gitun-an ang posibleng kaso nga ipasaka batok sa mga ginikanan sa maong batan-on. (BANAT NEWS)