CEBU, Philippines - Tungod sa kasuko sa usa ka kostumer nga wala pasudla sa usa ka imnanan, gwardiya nga mibabag kaniya iyang gipamusil, apan swerteng way bisan usa nga naigo.
Dali nga nagpatabang sa Fuente Police Station ang duha ka mga guwardiya sa Harrison Park nga nahimutang sa J. Urgellio, Barangay Sambag 1.
Ang mga nireklamong guwardiya mao sila si S/G Ricky Desaville, 31, taga Santa Fe, Bantayan, Cebu og Melecio Arcillas, 47, taga Alaska Mambaling, Cebu City ug konektado sa Philippine Mutual Agency.
Sa imbestigasyon sa Fuente Police Station, gibutyag ni Chief Inspector Wildemar Tiu nga wala pasudla sa duha ang maong lalaki human nga nagdala kini og iyang kaugalingon nga ilimnon nga bawal sa palisiya sa maong establisamento.
Matud pa nga miinsister ang maong lalaki nga misangpot sa panaglalis tali sa duha ka guwardiya. Apan sa kasuko sa lalaki nga dili kini pasudlon mikuha sa iyang revolver dayong pusil sa mga gwardiya.
Apan mikagar ang iyang armas hinungdan nga nakalayat ang duha ka guwardiya ug nakatago, anha pa mibuto ang armas sa maong lalaki ug naigo ang bungbong.
Human sa pagpamusil dali gilayon nga misakay og motorsiklo sa iyang kauban ang maong lalaki ug mipasirit palayo sa lugar.
Nakuha sab sa kapulisan ang usa ka deformed slug, matud pa ni Tiu nga duna na sila’y ideya kun si kinsa kini. (BANAT NEWS)