CEBU, Philippines - Nailhan na sa Philippine Drug Enforcement Agency (PDEA) 7 ang nagpadala sa P8 milyon nga shabu ngadto sa inahan ug anak nga Editha ug Maricris Paul sa miaging semana.
Si Atty. Mauro Licen sa PDEA miingon nga nailhan nila ang maong babaye tungod sa dokumento nga nakuha sa PDEA gikan sa private courier.
Ang maong tawo naila nga si Sheilla Mae Baltazar nga nagdala sa address nga Alabang sa Muntinlupa.
Nagtuo si Licen nga ang maong babaye nangalyas lamang ug wala maggamit sa iyang tinuod nga pangalan apan giimbestigar pa nila ang maong posibilidad.
Gumikan sa pagdumili ni Editha ug ni Maricris sa pagbutyag sa pangalan sa ilang amo sila maoy giduot karon sa PDEA nga tag-iya sa maong drugas.
Nasikop ang inahan ug anak human nila gi-claim ang usa ka package sa mga sandals nga gisudlan sa 20 ka putos sa shabu nga may gibug-atong 50 gramos matag usa.
Busa si Lecin miingon nga plano sa PDEA nga magpahigayon og tigom sa tanang courier company aron maalerto sila sa susamang mga modus. (BANAT NEWS)