CEBU, Philippines - Gipahimangnoan ni Cebu City Market Administrator Raquel Bohol Arce ang mga manindahay sa Unit III sa Carbon Public Market mahitungod sa illegal wire tapping nga posibleng maoy hinungdan sa sunog.
Sa niaging semana, usa ka sunog ang miulbo og kalit sa Unit III apan wala ra kini makakatap tungod kay dali ra kining napawong sa mga tawo sa maong lugar.
`Matud ni Arce nga dugay na silang nagpahinumdum sa mga nag-okupar sa Unit III nga dili gyud mohimo og illegal wire tapping apan giingong adunay usa nila ang wala motuman.
Si Arce mibutyag nga dihang ilang gisubay ang maong hitabo ilang nasayran nga usa ka Erik ang giingong nag-supply og ilegal nga kuryente sa mga manindahay sa Unit III.
Gidugang sa market administrator nga ang ginganlan og Erik maoy nagpaabang sa kuryente ug magbayad ang mga manindahay og P200 matag buwan.
Gipasabot ni Arce ngadto sa mga naninda nga ilegal ang gihimo ni Erik apan sila nagtoo nga legal kini tungod kay gipaagi man sa usa ka organisasyon sa Carbon ang ilang metro sa kuryente. Tungod sa maong hitabo, dili mominus 40 ka mga manindahay ang nakuhaan sa ilang suga nga giingong pulos nagbayad sa ginganlan og Erik.
Samtang asoy sa usa sa mga tindera sa dapit nga si Fely Rupinta nga nahibulong na lang siya kun nganong adunay sunog nga nahitabo sa maong dapit nga wala man sila naninda niadtong higayona.
Iyang gibutyag nga wala sila kaila sa ginganlan og Erik.
Nasayran nga si Arce nagpa-blotter na sa maong hitabo ug desidido kining mopasaka og kaso batok ni Erik kun kini madakpan. Iduso usab sa market administrator ang maong kaso ngadto sa City Legal Office sa Cebu City Hall. (BANAT NEWS)