CEBU, Philippines - Hingpit na nga magamit sa mga tinun-an ang nahuman na sa pag-ayo nga mga lawak saringan sa mga pangpublikong tunghaan sa dakbayan sa Mandaue human nihatag na og clearance ang buhatan sa City Engineer.
Kini ang gipadayag ni Benjamin Tiongson, administrator sa Department of Education (DepEd) Mandaue City Division, kinsa miingon nga ang paggamit sa giayo nga mga lawak saringan dako og ikatabang sa pagsulbad sa kakuwang og mga lawak saringan sa mga tinun-an.
Matud ni Tiongson nga ang tres porsiyento nga pagsaka sa gidaghanon sa ilang mga tinun-an sagad masinati sa matag tuig ug gipaabot na nila daan nga labaw pa niini ang pagsaka karong tuiga.
Kini tungod kay daghan ang namalhin nga mga tinun-an gikan sa pribado nga mga tunghaan nga nagpausbaw sa ilang matrikula.
Si Engr. Cielo Jamora nga maoy property custodian sa DepEd Mandaue City Division miingon nga mokabat na sa 23 ka lawak saringan ang nahuman pag-ayo ug daghan na ang nasugdan sa pagtrabaho apan ang pipila wala pa usab kasugdi og trabaho hangtud karong panahona.
Giangkon ni Jamora ang pagkuwang sa ilang mga lawak saringan apan ang ilang mga school principal nangita og paagi sa pagsulbad pinaagi sa pagbahig sa duha ka hugna sa ilang klase matag adlaw.
Si Jamora miingon nga laing section sa mga tinun-an ang magklase sa buntag ug ang laing section mao na usab ang magklase sa hapon. (BANAT NEWS)