CEBU, Philippines - Patay ang usa ka lalaki nga nalimbuwad ug nabunal sa dalan uban sa iyang gisakyang motor pasado alas -10 niadtong Biyernes sa gabii sa Mambaling flyover.
Ang namatay naila nga si Hugo Medalla Gabuya, 39, molupyo sa sitio Mansanitas, Barangay Cogon Pardo sa dakbayan sa Sugbo.
Base sa imbestigasyon ni SPO4 Ramon Budiongan, traffic investigator, nga ang biktima nagmaneho sa iyang motor sa fly-over sa Barangay Mambaling.
Apan kalit lang kini nga natumba ug nalimbuwad hinungdan nga nakaangkon kini og grabeng kadaot sa iyang lawas.
Daling gidala ang biktima ngadto sa Vicente Sotto Memorial Medical Center apan gideklarar na kini nga patay sa mga doktor. (BANAT NEWS)