CEBU, Philippines - Usa ka pump boat nga gipanag-iya sa usa ka dive shop diha sa Barangay Marigondon, dakbayan sa Lapu-Lapu ang giingong nabanggaan og cargo vessel kagahapon sa hapon diha sa kadagatan sa nahisgutang lugar duol sa Sulpa Island.
Si Ensign Lalaine Manopol sa Philippine Coast Guard (PCG) Cebu Station mibutyag sa Banat News kagahapon nga ang insidente nahitabo mga ala 1:30 kagahapon sa hapon apan walay gikatahong naangol sa maong insidente. Ang nahisgutang pumpboat mao ang Boyla 4 nga gipanag-iya sa usa ka diving shop diha sa Marigondon.
Ang maong pumpboat dunay sakay nga tulo ka tripulante ug duha ka guests sa dive shop. Ang cargo vessel mao ang M/V Provider.
Matud pa ni Manopol nga ang Super Blue nga pump boat diin sakay ang duha ka mga sakop sa PCG sa Mandaue Station ang mi-rescue sa mga pasahero sa Boyla 4 ug mga alas 6:30 sa gabii kagahapon luwas nga nabalik diha sa resort sa Boyla sa Marigondon ang maong mga pasahero. Sa oras niining pagbalita ang PCG nanguha pa og dugang detalye sa aksidente lakip na niini ang shipping line company sa barko ug sa hinungdan sa maong aksidente sa kadagatan. Gikataho nga ang nahisgutang cargo vessel nagkarga kini og mga semento gikan sa Davao paingon unta ngadto sa lungsod sa San Fernando. (/EIM)(BANAT NEWS)