CEBU, Philippines - Hatagan ni Lapu-Lapu City Mayor Paz Radaza og P10 milyones gikan sa P88 milyones nga pasiunang bayad sa buhis sa Mactan-Cebu International Airport Authority nga gibayad niini ngadto sa siyudad.
Kini maoy gibutyag ni Lapu-Lapu Schools Division Superintendent Dr. Eduardo Ompad atol sa press conference kagahapon sa buntag.
Matud pa ni Ompad nga gitug-anan siya sa mayor bahin sa maong pundo gikan sa Special Education Fund o SEF sa siyudad aron gamiton pagtukod og dugang lawak-saringan. Ang MCIAA mibayad og P88 milyones isip pasiunang bayad sa "real property tax" niini sa dakbayan nga mokabat sa P1.8 bilyones.
Sa pagkakaron, tagduha ka klase ang buhaton aron ma-accommodate ang nagkadaghang mga tinun-an.
Mapasalamaton si Dr. Ompad nga wala magkulang ang iyang mga magtutudlo sa Lapu-Lapu diin adunay 236 ka mga bag-ong gi-hire nga mga nagtutudlo karong tuiga alang lamang sa Lapu-Lapu.
Bugtong problema ni Ompad mao ang kakulang nga 468 ka mga lawak saringan. (BANAT NEWS)