CEBU, Philippines - Nakabsan sa iyang kinabuhi diha sa tambalanan ang lalaking gipasanginlang mipusil patay sa usa ka residente diha sa Sitio Libo, Barangay Mohon dakbayan sa Talisay nga gitabangan og kulata sa mga silingan ug paryente sa iyang biktima.
Ang namatay mao si Carlo Oyo-a, kinsa suspetsado sa pagpusil patay kang Jhonny Laranio niadtong milabay’ng Domingo. Si Oyo-a misulod ilawom sa imburnal ug didto nagtago sud sa duha ka adlaw ug niadtong Martes sa buntag pa migawas.
Apan nag-atang diay gihapon ang mga tawong migukod kaniya sukad pa niadtong Domingo ug gitabangan kini pagkulata ug puspos hinungdan sa pagkalandig niini sa Vicente Sotto Memorial Medical Center. Matud pa nanulo og isda sa humayan si Laranio dihang kalit kining gipusil sa suspek diha sa dughan.
Si SPO1 Mikie Espina nga nahinabi sa Banat News mibutyag nga mga alas 11:40 sa buntag kagahapon gideklara ni Dr. RJ Louie Aguanta sa VSMMC nga namatay si Oyo-a tungod sa dugo nga mibagtok sa ulo niini.
Matud ni Espina nga si Oyo-a nakaangkon kini og mga bun-og sa lawas, ulo ug tinigbasan sa walang bukton. Napasakaan na kini og kaso niadtong Martes sa hapon tungod sa pagpatay kang Laranio. Nasayran usab nga dugay nang may panagbingkil si Oyo-a ug Laranio. (BANAT NEWS)