CEBU, Philippines - Mga ginikanan ug kabataan sa Gun-ob Elementary School sa dakbayan sa Lapu-Lapu nagdasok sa gawas sa ganghaan niini human giingong wala dayon tuguti ang mga ginikanan nga makahatud sa sud sa ilang mga anak atol sa unang adlaw sa pag-abli sa klase kagahapon.
Matud pa nga ang polisiya sa maong tunghaan nga dili pasudlon ang mga ginikanan sa mga bata nga maghatod sa ilang mga anak.
Usa ka ginikanan (dili magpaila) naghilak sa kalagot misaysay sa Banat News nga grade 1 ug kinder pa ang iyang mga anak nga gihatod ug dili pa kini makatultol sa pagpangita sa ilang mga ngalan kung hain sila nga section ibutang maong gikasagmuyo niya nga dili sila pasudlon.
Naghugop ang mga ginikanan sa gawas nga bahin sa gate hinungdan nga nakapahuot sila sa trapiko. Hinuon ang hepe sa Police Station 3 nga si Senior Inspector Wilbert Parilla nakigtagbo ni Marissa Maglangit ang school principal aron nga masulbad ang problema.
Hinuon gitugotan usab dayon nga makasulod ang mga ginikanan aron ihatud ilang mga anak, apan giklaro ni Lapu-Lapu City Schools Division Superintendent Dr. Eduardo Ompad nga polisiya gyud nila nga dili pasudlon ang mga ginikanan.
Apan ikonsiderar nila ang unang adlaw aron makatultol sa ilang lawak saringan ang mga bata ilabi na ang mga naa sa kinder ug grade 1.
Matud pa nga ang mga ginikanan sa kinder kutob lang tulo ka bulan nga tugotang makasud sa tunghaan, tumong niini nga makat-on ang bata sa iyang kaugalingon ug di magduha-duha pagtungha. (BANAT NEWS)