CEBU, Philippines - Gidakop sa kapolisan ang duha ka dispatchers nga ilang naaktohan nga nanawag og pasahero nga mosakay sa public utility jeepneys sa dalan M.C. Briones, Guizo, dakbayan sa Mandaue alas 11 pasado sa niaging Domingo sa gabii.
Ang gidakop mao sila si Jaylord Condrillon, 20, taga Maharlika, Tipolo sa maong dakbayan ug Archie Tolentino, 25, taga Yati, lungsod sa Liloan.
Si PO1 Jerome Lendio sa Presinto 1 sa Mandaue City Police Office (MCPO ) miingon nga si PO1 Rogie Soqueño nga ilang sakop sa intelligence section ug mga sakop sa ilang mobile patrol maoy nakamatikod sa duha ka suspetsado nga nanawag og pasahero sa PUJ.
Gidili sa dakbayan ang mga dispatchers nga manawag og pasahero ug mangayo og kwarta sa drayber o sa konduktor subay sa Anti-Dispatching Ordinance.
Matud ni Lendio nga naglakip sa ebidensiya nga ilang nasakmit sa duha ka dinakpan mao ang P60 nga sinsilyo nga ilang gituohang kinolekta gikan sa mga drayber sa PUJ.
Kasong kalapasan sa nahisgutang ordinansa ang ipasaka batok sa mga dinakpan. (BANAT NEWS)