CEBU, Philippines - Gibutangan sa Department of Environment and Natural Resources-7 og monitor nga gitawag og Autonomous Reef Monitoring Structure (ARMS) ang marine sanctuary sa Barangay Alegria, lungsod sa Cordova atol sa pagtak-op sa Ocean Month niadtong Biyernes.
Gidonar ang maong kahimanan sa US National Oceanic and Atmospheric Administration ug magpabilin kini sa maong lugar sa tibuok tuig 2014.
Si Theresa Mundita Lim, direktor sa Biodiversity Management Bureau, miingon nga ang kahimanan motala sa nagkadaiyang micro-organism sa lugar.
Gitambongan ni DENR-7 Regional Director Isabelo Montejo ug mga opisyal sa lungsod sa Cordova ang pagbutang sa monitor.
Nasayran nga ang lalawigan sa Sugbo makighiusa usab sa ubang lugar sa pagsaulog sa Coral Triangle Day karong Hunyo 9.
Sa maong adlaw, ang mga lokal nga kagamhanan maghiusa sa pagmugna og kalihukan nga maglambigit sa kalikupan sama sa beach clean-up ug mangrove planting. (BANAT NEWS)