CEBU, Philippines - Tulo ang samdan diin duha niini ang menor de edad human kalit nga mibuto ang armas sa ilang silingan nga matud pa giduwaan niini sa miaging gabii sa Mananga II, Barangay Tabunok, Talisay City.
Samdan ug nalandig sa tambalanan sila si Juanita Cañedo, 2; Laurence Caparida, 11; ug Jocelyn Mandawe, 41, nga pulos residente sa maong lugar. Dali silang gidala sa Talisay City Hospital ug gibalhin ngadto sa Vicente Sotto Memorial Medical Center sa Cebu City.
Ang suspek nga si Tirso Icoy, 41, matud pa nakit-an sa mga silingan nga suspek nga nagduwa sa armas niini ug kalit lang aduna sila’y nadunggan nga usa ka sipa nga buto sa armas. Mao na lay ilang nahibaw-an nga dunay nangaigo. Matud pa nga si Caparida nagtan-aw kini og salida gawas sa panimalay ni Lesley Catidrilla sa dihang naigo kini sa walang bukton. Ang ricochet o pagbanda sa bala, napadung kini sa tuong kamot ni Cañedo dayong lapos ngadto sa liog ni Mandawe.
“Si Mandawe nagkugos na sa bata unya kanang bata iyang kamot naa sa liog sa gakugos,†matud ni Insp. Rogene Fudotan, Talisay City investigator.
Ang kapulisan padayon karon nga mihimo og hot pursuit operation sa suspek nga daling misibat sa lugar. Usa ka kabhang sa 9mm nga pistol ang narekober sa crime scene. (BANAT NEWS)