CEBU, Philippines - Nagtingkagol sa Cebu City Police detention cell ang usa ka suspetsadong pusher human kini masikop sa gipahigayong buy-bust operation sa city Anti-Illegal Drugs Special Operation Task Group (CAIDSOT) sa miaging adlaw diha sa Barangay Lorega, dakbayan sa Sugbo.
Ang nasikop naila nga si Jesus Lucero, 26, molupyo sa nahisgutang lugar mag-atubang kini og kasong kalapasan sa Section 5 ug 11 sa Article 2 sa Akta Republika 9165 kon “Comprehensive Dangerous Drugs Act Lawâ€.
Si Senior Inspector Eunil Avergonzado sa CAIDSOT mibutyag nga nakadawat sila og taho nga giingong nalambigit si Lucero sa pagpamaligya og shabu hinungdan gipaubos nila kini sa surveillance operation.
Ug dihang nakompirma nila ang maong taho mipahigayon dayon sila og buy-bust operation batok kang Lucero kinsa usa ka sakop sa CAIDSOT ang gihimong poseur buyer. Human giingong mitunol si Lucero og usa ka paketeng shabu ngadto sa polis nga poseur buyer gisikop dayon sa grupo ang suspetsado.
Giingong naimbargo sa mga polis gikan sa posisyon ni Lucero ang 51 ka gagmay’ng paketeng shabu ug kalibre .357 nga revolver nga dunay mga bala. (BANAT NEWS)