Duha ka tawo naghigkog, usa patay

CEBU, Philippines - Patay nang napalgan diha sulod sa kwarto sa ilang balay sa Phase II, Barangay Pulpogan, lungsod sa Consolacion ang 21-anyos nga lalaki kinsa naghikog gamit ang bakus nga gihigot sa iyang liog niadtong Biyernes sa tungang gabii. Si SPO3 Renerio Patillas sa Consolacion Police Station miila sa namatay nga si Reynaldo Booc, ulitawo, hingkod ang panuigon, residente sa maong dapit.

Matud ni Patillas nga ang maguwang ni Reynaldo nga si Richard Booc maoy nakadiskubre sa iyang manghud nga nagbitay na diha sulod sa kwarto sa ilang balay diin ang liog niini dunay higot nga bakus.    

Si Richard daling nangayo og panabang sa sakop sa ilang pamilya ug sa ilang mga silingan ug dali nilang gikuha si Reynaldo ug gidala ngadto sa Eversely Child Sanitarium General Hospital sa Barangay Jagobiao apan patay na kining naabot sa maong tambalanan.

Si Patillas nagkanayon usab kini nga ang pamilya ni Reynaldo mibutyag ngadto kanila nga ang namatay misuway na kini og hikog sa milabay’ng tuig apan naluwas kini sa sakop sa ilang pamilya.

Sa laing bahin, usa ka lalaki kinsa giingong naghambin sa sakit nga nervous breakdown ang naangol human kini misuway sa paghikog pinaagi sa pagdunggab sa iyang kaugalingon gamit ang kutsilyo sa milabay’ng hapon sa Sitio Caimito, Barangay Canjulao, dakbayan sa Lapu-Lapu.

Ang misuway sa paghikog mao si Marvin Subacajan Cagas, 31, ulitawo, residente sa maong dapit.

Si SPO1 Allan Pantaleon sa Lapu-Lapu City Police Office mibutyag nga ang igsuon ni Marvin nga si Maria Theresa Cagas Guibone giingong misulti nga ang iyang igsuon naghambin sa sakit nga nervous breakdown. Giingong si Marvin makig-istorya kini sa iyang kaugalingon ug giingon usab nga mireklamo kining dunay tawong nagsunod kaniya nga buot mopatay kaniya ug ang maong tawo sama sa hitsura ni “Kamatayan”.

Sa wala pa mahitabo ang paghikog si Marvin giingong mireklamo kang Guibone nga sakit kaayo ang iyang tiyan ug wala’y laing makatambal niini mao  lang ang kamatayon. Giingong gibalewa lang ni Guibone ang gisulti sa iyang igsuon apan nakugang na lang sila dihang napalgan na nila kining nagkadugo tungod kay nag-unay og dunggab sa iyang kaugalingon.

Si Marvin daling gidala sa usa sa mga tambalanan sa dakbayan sa Lapu-Lapu ug gibalhin kini sa Vicente Sotto Memorial Medical Center.  (BANAT NEWS)