CEBU, Philippines - Duha ka managsuon ang gisaka diha sa ilang payag ug gipamusil nga miresulta sa kamatayon sa usa ug pagkaangol usab sa maguwang diha sa Barangay Lanipga, lungsod sa Consolacion niadtong Huwebes sa gabii.
Ang namatay mao si Riel Baguio Mendaros, 18, samtang naangol mao ang magulang niini nga si Arnel Baguio Mendaros, 20, pulos nagpuyo sa maong dapit.
Si PO3 Charlie Valmoria, imbestigador sa kapolisan sa nahisgotang lungsod miingon nga nangatulog na ang duha sa ilang payag dihang miabot ang wa mailhing tawo ug diretsong namusil kanila.
Si Arnel kinsa nakahimo pa pagdagan bisan samaron daling nakapangayo og tabang hinungdan nga miikyas ang mamumuno. Ang duha gidala sa Eversely Child Sanitarium General Hospital sa dakbayan sa Mandaue apan patay na si Riel paghiabot. Dugang pa ni PO3 Valmoria nga si Arnel nakabaton og mga samad pinusilan sa iyang kalawasan ug gibalhin sa Vicente Sotto Memorial Medical Center.
Walo ka basiyo sa .9mm nga armas, usa ka live ammo ug usa ka deformed slug niini ang nakuha sa crime scene. Wa pa matino kung unsay motibo sa maong pagpamusil.(/EIM)(BANAT NEWS)