CEBU, Philippines - Patay na dihang napalgan ang usa ka German national sa sud sa iyang panimalay sa Barangay Gabi sa lungsod sa Cordova sa milabay’ng gabii.
Ang maong langyaw nga giingong adunay samad sa iyang ulo giila nga si Detlev Walter Harry Eiserman, 64, nagpuyo sa Ayoja Subdivision, sa maong barangay.
Sa pasiunang imbestigasyon ni PO2 Vilma Degamo sa Cordova police nasayran nga sayo niini ang asawa niini nga si Analiza Eiserman miabot dinhi sa Sugbu gikan sa Leyte kay nagsabot sila sa iyang bana nga sugaton kini sa pantalan sa dakbayan sa Sugbo.
Apan nahibulong kini nga wala makatunga si Detlev sa ilang sabot mipauli na lang kini nga nagsakay og taxi. Pag-abot ni Analiza sa ilang panimalay nakugang kini sa iyang pag-abot nga patay na iyang bana sud sa ilang lawak.
Sa pagresponde sa kapolisan sa Cordova nasuta ni PO2 Degamo nga dunay samad sa agtang ang biktima nga gituohang inagian sa usa ka gahi nga butang.
Gumikan niini nagduda si Degamo ug asawa sa biktima nga dunay laing tawo ang mihimo sa maong krimen. Walay nakitang ilhanan nga gitulis kini kay walay nawagtang nga mga gamit ug hapsay ang sud sa balay. Gipaabot karon ang resulta sa autopsy aron masuta kung unsay gikamatyan sa maong langyaw. (BANAT NEWS)