CEBU, Philippines - Moabot sa 28 ka mga nagkadaiyang matang sa armas ang nakuha sa Criminal Investigation and Detection Group 7 (CIDG) atol sa buy- bust operation batok sa tighimo og ilegal nga armas sa Barangay Suba, Danao City. Ang buy-bust operation gilusad sa CIDG-7 uban ang mga sakop sa Danao City Police Station ug target ang usa ka Eddie Gian nga naila na nga tighimo og ilegal nga armas sa maong lugar. Matud pa nga gipalitan unta sa mga polis og armas si Gian apan dihang misenyas na ang asset sa mga kauban nakabantay kini ug daling nakaambak sa likod nga bahin sa iyang balay ug lahos sa sapa nga bahin ug wala na gayud masikop pa sa kapulisan.
Sumala pa ni Police Inspector Reydian Corales, ang Assistant Team Leader sa CIDG Metro Cebu, si Gian naila nga usa sa mga big time nga ilegal gunmaker ug gunrunner sa maong lugar ug suki sa maong suspek nga baligyaan og armas ang mga tulisan ug mga motorcycle riding criminals. Nasakmit hinuon sa mga operatiba ang usa ka KG9 submachine pistol, lima ka .45 caliber pistols, usa ka .380 pistol, upat ka .357 revolvers, napulo ka .38 revolvers, duha ka.9mm calibre pistols, lima ka .22 revolvers, duha ka magazines sa KG9 ug duha ka magazine sa .45 caliber pistols. Dugang pa ni Corales nga base sa nakuha nila nga impormasyon, lima ka tuig nang namaligya og armas ang suspek.
Ang maong operasyon kabahin sa programa sa kapolisan nga “Oplan Paglalansag Omega†nga ang tumong sikopon ang mga loose firearms. (BANAT NEWS)