CEBU, Philippines - Si kanhi vice mayor Renato V. Osmeña sa dakbayan sa Sugbo namatay na kagahapon pipila ka adlaw human madakin-as samtang nagduwa og golf didto sa dakbayan sa Danao.
Ang iyang anak nga si Konsehal Ritchie Osmeña miingon nga ang iyang amahan namatay sa pangedaron nga 74-anyos alas 3:15 kagahapon sa kaadlawon sa Cebu Doctor’s Hospital.
Si Renato nga gitawag sa angga nga “R-O†ngadto sa iyang kahigalaan miadto sa Club Filipino Golf Course aron pagduwa og golf, apan aksidente nga nadakin-as ug matud pa nakaangkon og kadaot sa bukog sa iyang bat-ang.
Gidala ang kanhi bise mayor sa ospital ug gioperahan apan wala gayud makaagwanta sa iyang kahimtang.
Nagsilbi si Renato nga konsehal ug dayon nahimo nga bise mayor gikan sa 1998 ngadto sa 2004. Atol sa termino ni kanhi mayor Tomas Osmeña gihatagan siya og katungod nga modumala sa Police Coordinating and Advisory Council (PCAC) ug gihulagway nga maayo niya nga nadumala ang kapolisan.
Siya usab ang nagdumala isip overall chairman sa tinuig nga Sinulog Grand Parade ug bisan miretiro na siya sa politika padayon si Renato nga nagserbisyo isip direktor sa Sinulog Foundation Inc. Ang lawas ni Renato i-cremate karong Domingo o kaha Lunes kun moabot na ang usa niya ka anak nga gikan sa laing nasud. (BANAT NEWS)