CEBU, Philippines - Tawo nga nanghambog nga maayo siya modakop og mga bitin gipunggotan sa liog sa iyang gikainom didto sa Sitio Kalubihan, Barangay Marigondon, dakbayan sa Lapu-Lapu kaniadto’ng Lunes sa gabii.
Ang gipunggotan sa iyang liog mao si Florencio Lobo, 54, minyo ug nagpuyo gihapon sa Sitio Kalubihan. Ang gitumbok nga mipunggot sa ulo sa biktima mao ang iyang silingan nga si Russel Colacado, 40-anyos.
Ang manghod ni Russel nga si Alfredo Colacado, 34, ulitawo, posible nga iapil usab sa kaso kay iyang gipugngan ang asawa ni Lobo nga makaduol unta aron mapugngan ang pagpatay sa iyang bana. Matud nila ni SPO2 Manolito Abellanosa ug PO2 Jerson Alparito nga sa wala pa ang hitabo nag-inom og tuba sila si Lobo ug ang magsuong Colacado sa usa ka tindahan ug sa diha nga nangahubog na, nagkontes sila og hambog.
Si Lobo nangangkon nga maayo kaayo siya modakop og mga bitin ug gani daghan na kaayo siya og napatay nga mga bitin.
Sigun sa mga saksi nga si Russel nasuko nga nalupig siya sa hambog nga maayo kaayo modakop og bitin si Lobo mao nga mikuha siya og pinote dayong tigbas sa liog sa biktima.
Ang putol nga ulo sa biktima didto na makit-i nga gitagoan sulod sa giabandonar nga ligid sa sakyanan nga nahimutang pipila ka dupa ang gilay-on gikan sa iyang lawas.
Ang magsuon Colacado abtik kaayo nga misibat human nga napatay si Lobo. Adunay mga saksi nga nakatug-an sagad magmaoy si Lobo kun mahubog ug manghagit sa ilang mga silingan hinungdan nga posibleng wala na makaagwanta si Colacado ug iya kining gipatay. (BANAT NEWS)