CEBU, Philippines - Gidakop sa usa ka sakop sa Special Weapon and Tactics (SWAT) ang usa ka lalaki nga nasakmitan nila og dako’ng putos nga gisudlan og pinauga nga marijuana didto sa Sitio Capulay, Barangay Tayud, Liloan.
Si Junrey Pepito, 20, ulitawo nga nagpuyo sa maong dapit nasakmitan og mga uga nga dahon sa marijuana ni SPO1 Arthur Sabang, sakop sa SWAT sa Cebu City Police Office. Nasigpatan siya ni SPO1 Sabang nga nagbitbit sa putos ug katahapan ang linihokan mao nga girekisa ang sulod ug namatud-an nga marijuana diay ang sulod.
Si PO3 Jesson Gayo, sakop sa Liloan Police Station, miingon nga gawas sa marijuana nasakmitan pa gayud og mga tinfoil si Pepito atol sa iya’ng pagkasikop.
Gitahan ni SPO1 Sabang ang maong suspetsado ngadto sa ilang buhatan uban sa mga ebidensiya nga nasakmit ug hinungdan sa pagkabalhug niini sa ilang detention cell.
Samtang nadakpan usab sa kapolisan si Regean Agujar, 26, ulitawo nga nagpuyo gihapon Barangay Tayud atol sa buy-bust operation ug nasakmitan kini og tulo ka pakete’ng shabu ug kahimanan sa paghingos sa shabu.
Si PO3 Charlie Valmoria, sakop sa Liloan Police Station, miingon nga nakadawat sila og report gikan sa pipila ka lumolupyo sa maong dapit sa kalambigitan ni Agujar sa pagpamaligya og drugas.
Matud ni Valmoria nga mibaligya si Agujar og shabu ngadto sa nagpatuo nga adik bugti ang P200 nga mark money.
Human madakpi, girekisa sa mga polis si Agujar ug nasakmitan pa og lain nga duha ka pakete sa shabu ingon man P300 nga gituohang halin sa shabu. (BANAT NEWS)