CEBU, Philippines - Giawhag sa mga konsehal sa dakbayan ang Office of the Building Officials (OBO) pag- inspeksyon sa mga balay-patigayon dinhi sa dakbayan sa Sugbo aron pagsiguro nga lig-on ilang mga gipanggamit nga glass railings ug kalikayan ang mga aksidente.
Si Konsehal Alvin Dizon maoy miduso og resolusyon kabahin niini ug giuyonan sa tanang sakop sa Cebu City Council aron nga dili mahitabo pag-usab nga adunay bata nga natagak gikan sa usa ka dakong tindahan sa North Reclamation Area human mahugno ang bildo nga barandilya.
Usa ka Rhian Samuel Horca, 6-anyos ang natagak gikan sa dakong tindahan ug nabundak ngadto sa kinaubsan niadtong Abril 29. Matud ni Dizon nga ang mga ginikanan sa kabataan, giawhag nga magmatngon gayud sa ilang mga anak kun manuroy diha sa mga mall ug department stores.
Ang mga inspectors sa OBO giawhag nga sutaon g’yud kun lig-on ba ang mao nga mga bildo nga railings sa mga department stores ug nga nakatuman kini sa safety standards aron maproteksyonan ang mga tawo nga mamalit ug ang mosuroy sa mga malls, ilabina ang mga bata. (BANAT NEWS)