CEBU, Philippines - Giklaro karon sa Commission on Higher Education (CHED-7) nga ang giila nga pangulo sa Talisay City College (TCC) sa pagkakaron mao si Acting President Richelle Bacaltos.
Kini bisan pa man og si Dr. Paulus Cañete ang gipili ug giinsister ni Talisay City Mayor Johnny De Los Reyes nga maoy acting president sa TTC. Samtang sa gipagawas nga kamanduan sa Civil Service Commission (CSC) si kanhi TCC president Tomas Ramos ra gyud ilang giila tungod kay ilegal ang pagkatangtang niini sa katungdanan.
Sigon pa ni Education Supervisor II Dr. Josefino Ronquillo sa CHED-7 sa interview sa usa ka sibyaanan nga sa pagkakaron si Bacaltos pa ang nailang lehitimong acting presidente sa TCC.
Kay matud pa mao man kini ang nakakuha og tukmang papeles nga lehitimong modumala sa maong kolehiyo. Gitug-an ni Ronquillo nga bisan pa may desisyon ang CSC sa pagpa-reinstate ni Ramos, apan tungod kay wa man kini mopakita og interes nga mobalik sa TCC , si Bacaltos ra ang ilang giila.
Ang pamahayag sa CHED-7 gipagawas sa tuyo nga di mausik ang kwarta ug kahago sa mga tinun-an nga mag-enroll. Matud pa kinahanglang adto sila magpa-enroll sa buhatan ni Bacaltos.
Sa iyang bahin, si Cañete miingon nga dili makiangayon ang gihimo sa CHED-7 ug nibahad kining mohimo og legal nga lakang batok sa maong ahensya tungod sa gipagawas niini nga pamahayag bisan pa ang maong isyu nagung-ong karon sa korte. (BANAT NEWS)