CEBU, Philippines - Mipagawas na og desisyon ang Committee on Discipline batok sa mga kawani sa Kapitolyo nga nasakpang nag-inom atol sa oras nga tingtrabaho kaniadtong Biyernes sa hapon. Gitapos na sa CODI ang kontrata sa usa nga casual sa lima ka kawani nga nasakpan ni Gob. Hilario Davide III ug nagpadala na og notisya sa ahensya sa upat ka job orders nga dili na magkinahanglan ang Kapitolyo sa ilang serbisyo.
Samtang ang tulo ka regular nga mga kawani nga nasakpan ni Security Deputy Chief Bobby Legaspi nga nag-inom usab sa samang adlaw, gipasakaan og reklamo ngadto sa Civil Service subay sa balaod. Gani si Capitol Chief PIO Ethel Natera mitataw nga posibleng mataktak ang tulo sa serbisyo kay sila nakalapas man sa polisiya sa Kapitolyo sa ilang pagpangilad nga sila nag undertime apan wala mi-punch out.
Sama sa mga nagpositibo sa random drug testings, ang maong gikwestyong mga kawani gipaubos sa due process matud pang Natera. (BANAT NEWS)