CEBU, Philippines - Tulo ka mga construction workers nga nagtrabaho sa usa ka covered court sa Samboan ang nakuryentihan dihang aksidente nga nasablay ang ilang tubo sa linya sa kuryente sa Cebu Electric Cooperative (CEBECO) kagahapong adlawa, usa kanila ang patay samtang grabe ang duha. Patay na pag-abot sa Oslob District Hospital si Pablo Londete, 27, taga Barangay Bitaog, Oslob dihang nasaghiran niya sa gikuptang tubo ang linya sa kuryente hinungdan sa pagkasunog sa iyang lawas. Samtang angol usab sila si Jemar Basi, 25, ug Emy Ocamis, pulos taga Oslob.
Ang maong mga trabahante pulos empleyado sa Zion Construction Company ug nagtrabaho sa covered court sa Barangay Canorong, Samboan dihang nahitabo ang aksidente.
Matud pa ni PO2 Ressel Jabagat sa Samboan Police Station nga alas- 7 sa buntag nagtrabaho ang tulo sa usa ka poste apan dihang di makaabot ang ilang hagdanan gisab-it ni Lodente sa tubo ang gipangayong kabilya sa iyang kauban didto sa ibabaw. Apan tungod sa kataas ug sa gibug-aton, nabawog ang tubo ug nasanday sa linya sa kuryente hinungdan sa pagkatagak ni Lodente sa hagdanan padung sa ubos nga nag aso-aso ang lawas.
Tungod kay seven thousand kilovolts ang kuryente nibuto usab ang lapa-lapa ni Basi nga mas duol kang Lodente ug mikirig usab si Ocamis.
Gawas sa pagkasunog sa lawas ni Lodente, nabali usab ang bukton niini tungod sa pagkatagak gikan sa iyang gitungtongan. (BANAT NEWS)