CEBU, Philippines - Ang hepe sa City Health Department (CHD) nga si Dr. Daisy Villa gikatakdang paesplikahon atol sa sesyon sa konseho sa dakbayan sa Sugbo karong Mayo 28, 2014 sa giingong wala paghatag niini og kwalipikadong Medical Technologist (MedTech) diha sa health center sa Barangay Talamban.
Si Konsehal Arcilla giingong mipalabang kaniadto og resolusyon sa pagbutang og MedTech sa nahisgutang health center apan matud sa maong konsehal nga halos usa ka tuig na ang nakalabay wala pa gihapon butangi og MedTech ni Villa ang health center sa Talamban.
Ang pagbutang og MedTech diha sa nahisgutang barangay aron unta dili maglisud o mahasol ang mga pasyente sa pag-adto sa tambalanan sa pagpaeksamin sa ilang hugaw, ihi, dugo ug uban pa panahon kung gikina-hanglan kini.
Nunot niini, si Acting Mayor Edgardo Labella natahap nga posibleng tungod sa kakuwang sa ekipo sa Medical Laboratory hinungdang wala mabutangi og MedTech ang health center sa Talamban.
Si Labella nagplano sa paghatag og dugang ekipo alang sa Medical Laboratory diha sa Talamban Health Center. (BANAT NEWS)