CEBU, Philippines - Patay ang usa ka 40-anyos nga Indian national nga tigpautang human kini pusila sa duha ka lalaki niadtong Martes sa hapon diha sa Sitio Crusher, Barangay Lawaan III, dakbayan sa Talisay.
Ang biktima mao si Rajit Singh, minyo, nagpuyo diha sa Barangay Linao sa nahisgutang siyudad nakaangkon og samad pinusilan sa walang bahin sa lawas.
Ang mga suspetsado mao si Jonalo Cabrera alyas “Joan†ug Arjan Ababon, mga residente sa Sitio Crasher daling misibat human sa hitabo. Sila si SPO1 Mikie Espina, SPO1 Yvonne Illustrisimo ug PO1 Stephen Sefuesca ang daling miresponde sa maong hitabo.
Si Espina nga nahinabi sa Banat News kagahapon mibutyag nga sa wala pa mahitabo ang pagpatay nangolekta ang biktima sa mga utangan kaniya og kwarta diha sa nahitaboan, apan kalit lang mitungha ang mga suspetsado ug dayon gipusil ang biktima.
Na-recover sa mga polis gikan sa lugar nga nahitaboan ang motorsiklo sa biktima lakip na ang ubang mga butang niini ug kwarta.
Matud ni Espina nga usa sa motibo nga ilang gilantaw karon mao ang personal nga bangi nga naglambigit sa negosyo ni Singh kay wala hilabti ang mga butang ug kwarta niini.
Gituohan sa mga polis nga posibleng dunay nasuko kang Singh ug misugo sa duha ka suspetsado sa pagpapusil kaniya o ba kaha ang mga suspetsado maoy dunay personal nga kasuko niini. (BANAT NEWS)