CEBU, Philippines - Giklaro sa kadagkoan sa Lapu-Lapu City Police Office kagahapon nga lehitimong operasyon ang nahitabo kagahapon diha sa barangay Looc nga miresulta sa kamatayon sa duha ka mga drug suspects ug pagkaangol sa duha ka tawo lakip niini ang usa ka polis.
Mibahad karon ang LCPO nga hingusgan pa ug lutoson kadtong mga nalambigit sa ilegal nga drugas sa siyudad sa mosunod pang mga adlaw.
Sumala pa ni LCPO Acting Police Chief Senior Superintendent Armando Radoc una pa ang maong operasyon, dunay surveillance nga gihimo batok sa mga suspek human sila makadawat og impormasyon kabahin sa ilegal nilang kalihokan.
Napatay sa maong engkwentro sila si Marlon Ampatuan Yongco, 29, taga Barangay Guadalupe, Cebu City ug Romeo Obligado Daleon, 30, residente sa Barangay Looc, Lapu-Lapu City.
Samtang naangol sa maong pinusilay ang suspek nga si Romulo Cabase Mahinay, 56, taga residente sa Duljo Fatima, Cebu City ug ang polis nga si PO3 Joseph Villamor kinsa napusilan sa tiyan apan swerteng nagsuot kini og bullet proof vest apan maayo gihapong pagkalup-og sa yuta.
Si Senior Inspector Rogelio Pineda Jr., pangulo sa LCPO Intelligence Bureau miingon nga si Villamor mao ang ilang police decoy ug miduol sa itom nga Toyota Corolla aron pagpalit og drugas gikan sa mga suspek.
Apan matud pa nakabantay ang mga suspek ug gibirahan dayon si Villamor, tungod niini, ang mga kaubang polis ni Villamor nga nagpahipi sa palibot daling mirakrak sa awto sa mga suspek aron di na mausban pa si Villamor.
"Sa dihang nakita sa atong mga kaubanan nga nasamdan si PO3 Villamor, ang ilang gihimo mao ang pag-rescue kaniya ug pag-neutralize sa mga suspects," pagklaro pang Pineda. Si Villamor anaa karon sa tambalanan ug luwas na ang kahimtang.
Sila si Daleon ug Yongco nakaangkon og daghang samad pinusilan sa ilang ulo ug kalawasan samtang si Mahinay naigo sa walang kiting.
Si Daleon gitumbok nga level 2 drug pusher nga nag-operate sa Barangay Looc. Matud pa ni Radoc ang maong operasyon kabahin kini sa gihingusgang kampanya batok sa mga drug pushers sa maong siyduad. – Gikan sa The Freeman/EIM (BANAT NEWS)