CEBU, Philippines - Ang ika-walo nga most wanted person sa lungsod sa Jagna, Bohol nasikop sa kapolisan didto sa Barangay Opao, Pinamungajan kaniadtong miagi’ng udto.
Nadakpan sa mga sakop sa Pinamungajan Police Station si Richard “Rene†Alinton, 35, ug nagpuyo na sa Barangay Opao. Nagtinabangay ang kapolisan sa Pinamungajan ug Jagna pagpaniid aron madakpan nila si Alinton.
Si Pinamungajan Police Station chief Roseller Paller miingon nga si Alinton gidakop pinasikad sa warrant of arrest sa kaso’ng rape nga giluwatan ni Regional Trial Court (RTC) Executive Judge Dionesio Calibo Jr., sa lungsod sa Loay, Bohol.
Matud ni Paller nga dali sila’ng mihimo og surveillance human migawas ang WOA sa suspek kinsa diha magtago-tago sa Pinamungajan human giingon nga nanglugos didto sa Bohol.
Nasigpatan nila ang suspek atol sa pagsaulog sa kapistahan sa lungsod adtong Domingo nga miresulta sa pagkasikop niini.
Ang suspek wala hinuon mosukol dihang gidakop na siya sa kapolisan.
Matud ni PO3 Jill Rasonabe, Women’s and Children’s Protection Desk officer sa Jagna Police Station, nga niadtong Pebrero 25 sa miaging tuig gilugos ni Alinton ang usa ka 38-anyos nga babaye didto sa Barangay Odiong, Jagna.
Sigun sa report giilad ni Alinton ang biktima nga nagpaabot niini ang iyang hinigugma sa usa ka barung-barong sa awaaw nga dapit apan sa pag-adto sa biktima ang suspek maoy nagpaabot kaniya. (/RUB)(BANAT NEWS)