CEBU, Philippines - Tulo ka mga wanted nasikop sa kapolisan sa dakbayan sa Sugbo sa managlahing operasyon.
Nasikop sa mga sakop sa Investigation and Detection Management Branch sa Cebu City Police Office ang usa ka wanted nga may upat ka managlahing warrants of arrest. Ang nasikop naila nga si Rolly Genelago, 33, molupyo sa Purok Dos, San Jose, Barangay Talamban sa dakbayan sa Sugbo.
Ang maong suspetsado may kaso nga giatubang nga child abuse, acts of lasciviousness, attempted rape ug rape.
Ang warrant of arrest sa maong suspeck gi-issue ni Judge Ester Veloso sa Regional Trial Court Branch 6 sa Cebu City. Nasikop ang suspek tungod sa tip sa usa ka impormante nga anaa nagtagotago ang suspek sa Tayud, Liloan.
Samtang nasikop sa mga sakop sa Warrants and Subpoena Section sa CCPO ang magtiayon Elaine Christine Savatiera, 38, ug si Gerald Savatiera nga molupyo sa Tres De Abril sa dakbayan sa Sugbo. Ang duha may warrant of arrest nga gi-issue ni Judge Marilou Tamang sa Branch 72 sa dakbayan sa Pasig.
Ang maong mga suspeck nag-atubang og kasong kalapasan sa BP 22 o bouncing check. (BANAT NEWS)