CEBU, Philippines - Kanhi empleyado sa usa ka kompaniya nga nahimutang sa Barangay Liloan, Santander ang miunay og tulis sa iyang kanhi gitrabahoan apan way swerte ang suspek kay nasikop kini sa kapolisan dihang misuway kini og sibat sakay sa usa ka fastcraft padulong sa Negros sa miaging hapon.
Ang suspetsado naila nga si John Ces Imbo, 25, nga kanhi kolektor sa Du Ek Sam Incorporated sa nahisgotan nga lungsod.
Pasado alas 12:00 sa miaging udto, nakadawat og alarma ang kapolisan sa Santander nga gitulis ang Du Ek Sam, Barangay Liloan Branch. Base sa imbestigasyon, ang suspek nagsul-ob og helmet ug miti-on og armas sa cashier nga si Elena Tabares, 29, ug mimando niini nga ihatag ang kwarta ngadto kaniya.
Dihang nadala na sa suspetsado ang kwarta misirit kini og padagan sa iyang motor.
Apan nadiskubrihan sa mga polis nga gibilin niini ang motor nga iyang gigamit sa pantalan sa Barangay Talisay sa lungsod sa Santander.
Busa nakig-alayon gilayon ang kapolisan sa Coast Guard nga nagbase sa maong pantalan ug daling gialerto ang mga pantalan sa Negros.
Matud pa nga niadtong orasa ang fastcraft lang nga padulong sa Amlan, Negros ang mibiyahi hinungdan nga gialerto sa kapolisan sa Santander ang mga polis sa maong lungsod.
Giatangan nang daan diha sa pantalan sa Amlan si Tabares kinsa dali kaayong nailhan tungod sa iyang gisuot nga sapot ug dihang girekisa ang gidala niining backpack nakit-an ang P43, 600 nga salapi, kalibre .45 nga pistola, usa ka magazine nga may pito ka bala, usa ka jacket, usa ka gamay nga shoulder bag, ug usa ka helmet. Way nahimo ang suspek gawas sa pagtahan sa iyang kaugalingon ngadto sa kapolisan.
Si PO3 Noel Estender, desk officer sa Santander miingon nga ang suspek mitug-an nga napugos kini pagtulis sa gitrabahoan kaniadto tungod kay dugay nang anaa sa Intensive Care Unit sa Dumaguete Provincial Hospital ang iyang masuso pa nga anak.
Matud pang Estender nga dako ang katingala sa pamilya sa suspetsado nga iya kining nabuhat tungod kay ang amahan niini nga usa ka retiradong sakop sa militar ug hilomon kini nga pagkatawo. (FREEMAN)