CEBU, Philippines - Hugot nga gidili sulod sa isdaan sa Lapu-Lapu City Public Market ang pagpanghumol sa isda aron dili kini makasamok sa mamalitay.
Kini bisan pa sa reklamo sa mga tinder og isda ngadto sa mga inspectors kinsa manakop niadtong manghumol og isda matag buntag.
Ang tindera nga si Cornelia Abing nagkanayon nga mura sila’g gigukod matag buntag sanglit atangan sila sa mga inspectors.
Matud niya nga dili sila hatagan og higayun nga makapanghumol sa ilahang igbabaligya nga isda.
Apan si Ma. Elena Caballes, market supervisor, mipasabot nga maoy palisiya nga kinahanglang limpyo ang isdaan ug gidili na ang pagpanghumol sa mga tindera.
Matud ni Caballes nga adunay receiving area diin adto makapanghumol ang mga tindera og isda.
Iyang gipasabot nga kung sa sulod sa merkado sila manghumol, maghitak ang tibuok fish section hinungdan sa pagkahugaw sa lugar.
Samtang gipasalig ni Caballes nga walay problema ang mga isda nga gipangbaligya sa ilang merkado sanglit aduna silay mga sinaligan nga gibansay sa Bureau of Fisheries and Aquatic Resources aron pagseguro nga wala’y mabaligya nga kuha sa ilegal nga panagat sama sa dinamita.
Hinoon may reklamo gihapon labot sa mga timbangan sa pipila ka mga tindera.
Matud ni Caballes nga dunay ipahigayun nga random inspection matag karon ug unya aron pagsusi sa mga timbangan. Samtang naproblema ang clearing operation head sa maong merkado nga si Marvin Francisco sa mga sidewalk vendors nga mabuntagan sa pagpaninda mugna sa Night Market.
Matud niya nga dapat alas 7 sa buntag wala nay maninda aron dili makamugna og trapik.
Hinoon sa kinatibuk-an sumala ni Francisco nga hapsay ra ang ilang Night Market. (BANAT NEWS)