CEBU, Philippines - Pakyas ang Philippine National Police Crime Laboratory-7 sa pagkuha og latent print sa mga improvised explosives nga nakit-an sulod sa Sola Homes Subdivision nga matud pa iya sa German nga si Hans Jurgen Hesse kinsa napusilan-patay human masaypi nga kawatan.
Kini gumikan kay ang mga improvised explosives nalukop sa diesel, matud ni Insp. Atilaño Fabellar, fingerprint examiner. Si Fabellar miingon nga ang mga botelya nga gisudlan sa diesel nga gihimong pabuto pulos basa hinungdan nga gikonsiderar nila kini nga totally damage.
Siya midugang nga padayon pa nilang gikuha ang mga ebidensiya sa crime scene pagpamasin nga aduna silay makuha didto nga latent print. Sa pagkakaron ang mga improvised explosives anaa sa property custodian samtang eksaminon pa sa chemist.
Si Fabellar miingon nga kung kinahanglanon gyud sa korte mapugos sila pagamit og fuming box.
Si Insp. Crisanto Abella, hepe sa Alcoy Police Station, sa iyang bahin miingon nga dili na kinahanglan ang latent prints kay napasaka na man ang kasong murder batok kang Jerome Niere. (BANAT NEWS)